韓式拜神法

香港人新年都會去廟到上香，求籤等等，祈求新嘅一年有好嘅運氣！

而韓國人都一樣會㗎，不過由於我哋係喺香港住，所以每逢新年婆婆都會喺屋企幫我哋拜神㗎！

係咪好想知究竟韓國人係點拜神嘅呢ㅎㅎ

每年都係一樣嘅步驟，但過咗咁多年其實我都唔明白發生緊咩事，因為實在太驚人(？)啦！

首先阿媽同婆婆會喺張枱度擺好個拜神位，上面有白飯，生果，肉，一包生米，同埋最重點嘅係：一大包入面有獨立包裝嘅糖/朱古力～

各種各樣我哋屋企會食嘅食物，然後點蠟燭放喺旁邊，跟住我哋就會企喺後面，望住婆婆對住張枱講一大堆韓文，然後重頭戲就嚟啦！

婆婆會叫我哋拎起件衫，好似想接住啲嘢咁，然後將嗰包獨立包裝嘅糖/朱古力，好似求籤咁抖出嚟跌落件衫度，如果糖嘅數量係雙數咁就冇問題，非常順利！

但如果係單數，就要將啲糖擺返入個袋度，跟住鞠個躬再重新倒過，不斷重複直至倒到雙數出嚟為止！！

啲糖就可以拎返去自己食咗佢～倒完糖之後，又繼續企喺後面望住婆婆講韓文ㅋㅋ

跟住下一個環節就係，婆婆會喺包生米到拎幾粒出嚟，叫我哋數下係咪雙數，如果係就生吞咗佢，咁如果唔係呢？

婆婆就會攞啲米丢你，然後你又再鞠躬，再攞啲米睇吓係咪雙數，又係一直重複直至係雙數為止⋯

然後就完㗎啦，跟住攞嚟拜神嘅所有食物都可以食，而我哋屋企每年拜神阿媽都會整수육 ，所以每次吞完啲生米就係我最期待食수육 嘅環節啦ㅎㅎ

話說第一年完全唔知係要攞件衫兜住啲糖，件衫太短，啲糖係咁跌落地，搞到係咁重複做咗好多次，自此之後，我就非常醒目地着件長啲嘅衫啦ㅋㅋ

不過每個家庭都有自己嘅習俗，都唔一定個個韓國家庭就係會咁樣做嘅，但韓國人拜神咁準，而且又有好嘢食，所以雖然咁多年我都唔明白，但我都非常願意接受俾啲米丢嘅祝福ㅋㅋㅋ

資料來源 ：

https://kcg.korea.kr/news/policyNewsView.do?newsId=148868532

https://leemart.sg/ko/products/lt-grape-snack-%EC%B2%AD%ED%8F%AC%EB%8F%84-%EC%BA%94%EB%94%94-127-5g

https://namu.wiki/w/%EC%8C%80

https://www.youtube.com/watch?app=desktop&v=S_xt0i80fuo