鍾意買韓國嘢嘅同學仔可能都會知，韓國真係非常多自家品牌/潮牌，當中嘅產品由文具，服裝，甚至家電/寵物產品都會有㗎！

但有冇發覺大多數都係印製類產品，叫做手作/手工製作嘅，通常都係得專門訂做/工匠類型嘅產品呢？

咁係因為雖然韓國人好鍾意藝術同靚嘅嘢，但的確唔太在意係咪手工製作~

對佢哋嚟講手工製作嘅價值都係體現喺傳統工藝上，而且能夠手工製作嘅話，自己買材料包返嚟整都可以啦！

再加上韓國嘅速遞實在太強大，即使係手作人通常都只會活躍於網絡，不論宣傳定銷售都可以喺網上完成，所以韓國好少手作人會去擺「手作市集」㗎！

因此雖然韓國好多週末市集，但通常都係以食物/二手貨品做主題，咁唔通真係冇得喺韓國逛手作店嗎？

雖然唔係周圍都有，但正正因為咁所以大部份手工類嘅嘢都會聚集喺仁寺洞 (인사동)！

換言之只要去仁寺洞 (인사동)就可以逛盡各種各樣嘅手工藝品啦~

出咗地鐵站行10分鐘左右，就會到達仁寺洞街 (인사동길) 顧名思義一直落去成條街都係手工藝店/咖啡店嚟㗎！

喺街度兩側嘅地舖，通常都係傳統工藝店，例如: 陶器，韓紙，傳統紙扇，茶葉等等，好處係仍然有好多係韓國人經營嘅傳統小店，所以唔會有咁多遊客區嘅海鮮價㗎！

如果想睇現代嘅手工藝品，就可以去位於街道中間，上面有ㅆ 標誌嘅建築物，入面係環形由地下到最高露天廣場，全部都係獨立品牌/手工製品店，例如: 手工娃娃，皮革產品，手作陶瓷等等，甚至入面賣嘅食物，都係好靚好適合打卡㗎！

話說當年第一次係同阿媽一齊去呢度 ，由於呀媽對手工藝品冇興趣，所以等啲女行街嘅時候，阿媽全程都係喺地下嘅一個塔羅牌攤檔到占卜ㅋㅋㅋ

當時好似係最少30000₩，然後一個問題10000₩，如果你有返咁上下迷信，都可以去做吓㗎，因為韓國人都係非常之迷信，應該都會幾準ㅎㅎ

資料來源 ：

https://thevaluenews.co.kr/news/163892

https://www.joongang.co.kr/article/21957615#home

https://mediahub.seoul.go.kr/archives/1504503